Pasahat Dengke
Dengke tio, tio ma panggabean, tio ma parhorasan
Dengke simudur mudur, asa sai marudurudur ma hamu mangalului parngoluan siapari dinalaho paturehon bere nami on,
Dengke saur jala dengke sahat ma on, sai saur ma antong ibana laho manjujung goarna i, imbur-imbur magodang sahat saur matua, tumpahon ni Tuhanta pardenggan basa i
Pasahat Ulos
Ulos parompa, sai anggiat ma antong mangompa las ni roha ma on di hamu, las nang pamatang ni bere nami
Ulos na ganjang, ganjang ma barita gabe, barita horas, bege on nami tu joloan ni arion
Umpasa:
Dangka ni bulu godang tanggo pinangaitaithon
Sai simbur magodang ma ibana mamboan goarna i, jala tokka ma panahitnahiton
Tubu ma tambisu di toru ni pinasa
Asi ma roha ni Tuhan ta, sai martinodohon anak dohot boru bere nami on, ima angka Anak nabisuk dohot boru na uli basa
Bona ni aek puli di dolok sitapongan
Sai tubu ma dihamu angka na uli, jala sai dor ma nang pangomoan
Sahat-sahat ni solu ma tu bontean na di Tigaras
Dung hu pasahat hami ulos parompaon, sai lelang ma bere nami on mangolu, sahat tu panggabean jala horas-horas
Manise
Asa serser inna mula ni tortor
Sise inna mula ni hata
Asa jolo ni nang-nang inna asa ni nung-nung
Jolo ni pangan inna asa sinungkun
Nunga bosur hami mangan indahan na las
Sagat marlompan juhut jala minum aek sitio-tio
Dia ma unokna, dia ma laklakna
Dia ma nidokna, dia ma hatana
Bagot namarhalto ma inna na niagatan di robean
Horas ma hami namanghon tu tambana ma di hamu namangalean
Sai marangkup do nauli mardongan inna nadenggan
Siangkupna songon nahundul, sidonganna songon na mardalan
Mangapu
Aek marjullak-jullak sian tonga-tonga ni batu
Jullak-jullak nai bahenon tu tabu tabu laho boanon tujabu
Hata nauli hata togar-togar naung pinasahat mu tu hami
Ampuon nami ma i antong martonga ni jabu.
Komentar
Posting Komentar